Uyuni – Atacama 三天團 – Day2

3月2日 Uyuni – Atacama 三天團 – Day2

食早餐果陣同利馬媽媽傾計, 原來佢地認為made in China既係好野黎!!好surprised! (咁比起秘魯貨黎講又應該好d既…..)

因為利馬媽媽係玩劍擊既, 有一次佢去完中國旅行順便買左d劍擊用品, 帶番秘魯比d朋友, 個個都讚不絕口, 覺得quality好好….

雖然所有團友其實都識講西班牙文, 但佢地成日都為左我而講英文, 好nice呀!

起旅館臨走果陣仲識左3個台灣人添, 前一晚食飯見到佢地仲以為係日本人, 佢地由Ecuador一路玩落黎, 點知第一站Ecuador就已經起hostel比人偷左野….陰公…

今日行程主要係睇D山, 奇石, 五顏六色既湖, Flamingo紅鶴 , Geyser 間歇泉

Laguna Verde (綠湖)

呢度好多草泥馬~~

我最中意呢一幕~~

利馬仔仔充當埋人肉腳架.....

黎到一片奇石林~

今日我地lunch既地方就係呢度喇~~唔信? 一陣你就知~

呢種綠色波波植物好得意~~

司機準備緊午餐桌喇~~

露天buffet~~

之後經過一個沙漠, 中間有個湖有好多Flamingo~ 呢度真係有魚? d Flamingo食咩生存架呢

今日天氣麻麻, 又天陰又強風, 但利馬媽媽依然面不改容咁好似影National Geographic咁起寒風之中打雀, 仲不斷Bebe前Bebe後咁叫佢個仔跑黎跑去攞鏡頭攞布, BB又要做埋人肉腳架….

呢一刻, 我終於明白其實BB並唔係好想同佢呀媽去旅行…亦明白點解佢尋晚有surprised既眼神….

又黎到另一舊奇石

起呢個沙漠之中有舊咁既石又真係幾神奇

臨走果陣見到有團強國團, 十二部Jeep浩浩蕩蕩咁駛埋黎, 認真巴屎閉.....

(好彩岩岩影完相, 我想像唔到每到一個景點都有幾十人一齊起度影相既景況.....)

去到 Laguna Colorada(紅湖), 終於出太陽!! 晴天下既紅湖好靚

呢度比起頭先仲多Flamingo

呢個高難度瑜珈動作黎喎....

黎到Geyser間歇泉, 四周圍煙霧瀰漫...仲有D地熱發電設備

司機打開左D geyser口比我地影相,  D煙噴出黎果下好誇張!

不過呢度都係超大風同好凍...巴西情侶影左一張相就即刻番上車....

呢晚住既鹽旅館係全團6個人訓埋同一間房既, 成班人柴娃娃咁一間房好似番左中學去宿營咁!!

放完行李出去飲茶食茶點, 導遊同我地講溫泉(6sol)離旅館行5分鐘就到, 可以揀食完晚飯去或者聽朝7點前去, 於是我地6個食完茶點就組隊去視察環境喇~6pm左右已經有好多人浸緊, 水溫夠熱~之後佢地決定食完飯就去浸喇~

大家番房休息, 見利馬媽媽執哂腳架準備又出去, 問佢去邊, 原來佢都中意影星空!! 於是我就跟利馬媽媽一齊出去影相喇~~

WOW!!! 成個天都係星星!! 頭先去睇溫泉果陣我都冇留意望下個天添!! 仲睇到好清楚既銀河!!!

雖然唔係起鹽湖度睇到, 起呢度睇到都好震撼!!

呢次係我人生之中第一次影到銀河!!! 影到第一張之後開心到攬住利馬媽媽大叫!!! 超感動呀!!!!

食完飯之後, 大家去溫泉意欲又有D降溫, 因為出面好似好凍…Estonia女不斷摟我地去…因為Estonia冬天係-30度, 而家呢種溫度對佢黎講係夏天XD!!! 我隻腳仲係腫到豬腳咁, 我講笑咁望住我隻腳問”Can you go?” 我話佢死左行唔到XD (不過真係驚浸完隻腳仲腫)

巴西男望住我隻腳都話呢隻根本唔係人類既腳!! 問我呢個星期究竟點樣行, 仲問我可唔可以同我隻腳影相! Hahahaha笑鬼死! 或者就係我對旅行既熱衷令我繼續行落去啦~~

巴西女不愧為醫生, 隨身帶住消炎藥, 見我隻腳咁恐怖比左2粒消炎藥我~

最終比Estonia女摟到巴西男陪佢去~ 我冇去浸到真係有D後悔…不過都冇計啦…