令人驚艷的Fitz Roy

3月27日 令人驚艷的Fitz Roy

8am起超市會合Emilie, 唔知係咪行百內果陣太攰, 果日回程已經攰到冇哂野講, 但今日一見番面又傾到雞啄唔斷! 佢係咁同我訴苦起百內果陣食晚飯遇到一家美國人, 爸爸係咁同佢講政治, 仲話”sorry, 我諗韓國唔會係未來既話事人, 中國先係blablabla…..” Emilie話聽完都唔知比咩反應佢好…之後又問samsung公司有幾多人, Emilie答完佢佢又話都唔係好多咋wor乜乜乜……...=口=||| 滴哂汗

Emilie仲話原來佢起Las torres hotel自己房窗口都睇到Torres既日出….咁我地咁辛苦上山睇做咩….

好彩有Emilie陪, 上Fitz Roy條路開頭係咁上斜都唔講得笑….

去到Mirador好好彩好清楚睇到Fitz Roy全貌!!超開心!!(尋日根本冇可能睇到…)

行多一陣就已經烏雲密佈見唔到Fitz Roy…不過全程都有好多紅葉, 又行得舒服, 過程比行百內行得更enjoy~

去到最後打大佬果1km奪命斜, 見到有個睇上去冇60都有50歲既德國婆婆自己行緊上去, 好勁!! 唔知我到果個年紀仲可唔可以好似佢咁行到山呢…

一路上去途中都起雲霧之中, 白濛濛一片…好擔心上到去咩都見唔到....

好好彩一上到Mirador D霧又好似開窗簾咁打開左!!! 又仲到尋日對中國couple, 話佢地起mirador等左40分鐘先等到, 我又係一黎到就見到, 佢地都話我係幸運之星hahaha

超清楚既Fitz Roy!! 靚到我瘋狂大叫so beautiful!!! 因為呢度冇風, 呢個湖係我有史以黎見過最平最靚既鏡!! 倒影超sharp!! 我個人覺得仲靚過百內既Mirador Torres!!

起度對住個靚景歎埋個lunch先~

走果陣個窗簾又拉番埋XD

回程果陣終於撞番韓國couple, 原來佢地今朝7點先send whatsapp比我約我8點半…算..整定既, 同Emilie行好似適合D

之後Emilie仲係咁數臭佢個變態波士同佢個ex, 好多笑料XD

番到Hostel想慰勞下自己, 慶祝終於完成左多日既trekking, 煎塊牛排賀一賀佢先~

之後執埋行李就搭夜巴去 Los Antiguos喇~~

雨中健行 – Laguna Torres@El Chaten

3月26日 雨中健行 – Laguna Torres@El Chaten

食完杯面又開始孤身上路~ 今日天氣麻麻, 所以今日先去Laguna Torres, 留番聽日先去El Chalten最有名既Fitz Roy~

行行下第一次見到有啄木鳥整緊自己間屋! 書上面就見得多, 但親眼睇就真係第一次!! 起度仲識左個比利時女仔Katherina, 佢大學畢業做左野5個月儲夠錢就出黎旅行喇~~之後佢Daddy Mammy仲會起秘魯join埋佢一齊旅行添!! 真羨慕外國人既生活…佢讀Maths但之後想起西班牙開間比利時餐廳, 因為佢話佢個個friend都去哂外國住同做野, 自己都想出去闖一闖咁話

行行下我地發現原來今日呢條route有搞馬拉松, 好多選手起我地身邊跑過~

有個伴一邊傾計一邊行唔經唔覺就到左Laguna Torres~~明明5分鐘之前仲好大霧, 一黎到就散哂, 真係好彩! 雖然天陰陰但見到個倒影都幾靚~~ 起度仲見到對中國couple, 好耐冇見過中國人喇…

又係嘆住靚景食lunch時間

Trekking map寫今日呢條route既難度係medium, 但我同Katherina都一致認為同百內比既話, 呢條route如果起百內只係屬於Easy Level!! 回程果陣又撞到尋日識既韓國couple Sarah佢地~佢地聽日又係行Fitz Roy, 於是交換左whatsapp約埋聽日一齊去~~ 冇幾耐又撞到冤鬼呀Greg…(第7次喇….應該冇下次喇掛…) 佢好proud咁話自己已經行完Fitz Roy, 準備去緊Laguna Torres, 我心諗, 咁趕好似行軍打杖咁做咩, 今日個天陰成咁又就黎落雨, 起Fitz Roy你又見到D咩丫?...Is it really fun?!

見完佢之後就開始落雨….好彩有帶雨衣…番hostel果陣先發現原來Katherina同我係同一間hostel, 真係有緣!! 跟住又去買餸煮飯~因為太回味果日煮既洋蔥雞, 於是今日又翻兜~ 一開始先去大超市, 一入去就有種呢個小鎮好似地震過後, 超市比人搶劫一空既感覺…好多貨架都係空既, yoghurt好彩比我買到最後一個….可樂都冇哂, 又冇雞賣, 唯有去番巴士站附近既細超市

食完dinner收到起法國谷識既韓妹Emilie send, 番相比我, 一問之下原來佢聽日又係去行Fitz Roy!!有冇咁橋!!(但呢晚都未收到Sarah覆我whatsapp)…因為預計聽朝天氣都麻麻, 應該睇唔到日出, 於是就約左8am起大超市一齊出發~~~

呢晚間dorm room full哂, 好熱鬧!! 有2個Israel既女仔..而家先知Israel女仔咁中意笑….成晚聽到佢地笑唔停…