Day8-10 木州 Moc Chau

原本呢3日係plan左去順化Hue附近既風芽國家公園, 

但後黎朋友send左個越南當地人既旅遊fb page比我, 

見到好多越南人呢個時候都去一個叫木州 Moc Chau既地方, 因為呢個時候梨花盛放

所以最終我就決定放棄風芽去木州喇~

去木州可以坐一D去Son La省既巴士, 點買巴士飛應該問下hostel就可以解決到架喇

但因為充滿冒險精神既巨蟹(少)女太中意揸電單車, 加上聽聞沿途風景都好靚既關係,

所以呢次我決定揸電單車去!!

上次起大叻第一日學識揸電單車就揸左100KM, 今次要挑戰200KM(單程)

搭巴士要坐5個鐘, 咁自己揸電單車呢?....(謎)

帶定充滿糧水8點半正式出發!

條路好簡單, 一路沿住QL6/(or叫AH13)公路行就到木州架喇

 Hoa Binh 附近

 中途都有D休息站可以食下野既, 好多大巴都有停起度

 上網睇話去到Mai Chau之後沿Da River既河邊行雖然條路係難行D, 但風景靚D,

好, 就信你一次

點知條路真係全泥路又窄又凹凸不平又有水TUM, 

行左半個鐘之後覺得唔對路(天黑都唔知到木州未....)

3點幾決定揸番出QL6(好彩中途有路轉番出去, 唔洗走回頭路)

中途經過一條小村落, 條路又窄又斜又轉彎, 終於抄左車...

不過自己一早知去到果個位Control唔到, 所以跳左出黎個人冇咩事

架車抄到連倒後鏡都飛左出黎, D村民都走哂出黎睇咩事...

熄左匙擺番好架車, 見條路咁難行諗住叫個村民幫我揸上去,

個村民幫我試下撻番著架車, 點知撻唔著, 仲對住我灑手擰頭...

唔通抄完車之後架車壞左?!!

"我今晚唔係要起呢條村訓呀嘛?"

"Plan左咁耐去木州唔通因為咁就去唔到?.."

"我唔夠錢賠架電單車架喎..."

"我又唔夠錢搭幾個鐘的士番河內架喎..."

"我點拉架車出番QL6呀...."

我望住個村民, 心入面閃左N個問題出黎, 

呢次真係企左起度...無計可施之下我再試下撻下架車

SHIT!一撻就著!!!!原來呢個村民灑手擰頭係想同我講佢唔識揸電單車!!!

差D嚇到我鼻哥窿都冇肉呀X你!!

幾經辛苦繼續沿小路出番QL6, 距離木州仲有10KM左右會經過D少數民族既村落

 亦都終於見到梨花樹~~

 不過葉仲多過花, 有D失望...

 去到距離木州仲有3KM 左右會經過一塊好大既花田, 入場費15000VND(5HKD左右)

 好好彩遇到個去過台灣讀書識講普通話既男仔, 影相仲好叻添~

 佢呀爸呀媽聽到我竟然係香港黎既仲好興奮咁擺POSE比我影相XD

好, 繼續進發!

 5點左右終於黎到木州市, 出發越南前就book定一間homestay, 

但因為間homestay d staff唔識英文, 我托左上次起大叻識, 住起河內既越南朋友幫手BOOK

網址上面只係有寫佢起Ang village 同埋homstay既相:

所以我以為會好易搵, 點知起Ang Village有幾十(可能係幾百間)都係紅色屋頂既屋...

正起我起Ang Village遊客區附近兜左好耐都搵唔到, 又就黎天黑既時候,

有個好心既村民主動問我洗唔洗幫手(用越南文)

我打開網址比佢睇, 佢叫我企起度等佢一陣, 

佢竟然番入屋揸左佢架電單車出黎話同我一齊搵, 叫我跟住佢, 

即刻FEEL到人間有情呀!!!

兜左2分鐘左右似乎佢都搵唔到...我醒起可以叫佢打去homestay問起邊,

佢打完之後就好順利咁帶左我黎homestay喇~~~Yeah!!!

間homestay有個小農場

 呢間係homestay主人住既地方

 因為係新年, homestay主人D親戚都黎哂佢呢度食飯

 homestay主人其中有個親戚竟然識講英文, 仲同我講新年流流請埋我同個staff屋企人一齊食飯!

 雖然餸菜睇落麻麻, 但係係好好食架~

 Homestay個staff仲好似楊冪添!! 

雖然佢唔識講英文, 但我地食飯全程用google translate傾計, 溝通完全冇問題!

起廚房仲煮緊野既竟然係其他遊客自己煮緊比自己食XD

 食完飯同D小朋友扭下氣球, 玩下Framy個APP, 開開心心又一晚lu~

估唔到D小朋友都咁中意同我呢個唔識越南文既陌生姐姐玩HAHA~

呢個夜晚真係覺得好感恩, 經過8個鐘既電單車之旅, 

由曾經以為自己黎唔到木州, 搵唔到homestay, 到同楊冪一齊食新年飯, 一切都來得唔容易...

又一個滿天繁星的晚上

~End of Day8~

木州既第二日， 終於冇咁懶睇左我今次北越之旅第二個日出， 因為唔知邊個位睇日出先靚， 揸住電單車起Ang village 附近亂兜左陣， 呢個位唔錯！

影完日出再繼續亂咁行入人地d 村落，遊客區後面有一大片田

7點幾番番hostel 食早餐梳洗下又再次出發， 

黎番Ang village 旅遊區~

呢度有一個湖，比Pine forest 包圍住

好少可有公園可以揸住電單車起入面行！

就起呢度附近遇到5個越南人想搵我幫佢地手影相，

 佢地以為我都係越南人haha

佢地仲竟然識講流利英文！原來佢地係之前起河內讀大學既， 5個都係起大學果陣識既大學同學

其中Nam知道我係自己由香港黎之後叫我不如跟佢地一齊玩， 緊係好啦！
尤其起呢個幾乎冇人識講英文既木州XD

之後我地行左上pine forest

好韓妹feel 既Ngo,  Thuy,  Anh

Ngo成日做導演叫Nam(佢bf) 同佢影呢d 相，

 好好笑好正！

我話幫佢地起度影合照， Ngo竟然仲問我有冇睇那些年， 話要好似那些年poster咁影， 好有親切感呀

問左公園staff 知道pine forest 後面有塊花田，不過冇我尋日去果塊咁靚

估唔到Anh 仲唔知幾時整左個花環比我， so surprised! 

之後佢地話去木州最出名既景點茶葉園， 但佢地未搵點去， 但我其實一早bookmark 左！木州有幾個茶葉園， 最近既係Doi Che Trai Tim,  即刻教Ngo用google map 點去， 突然覺得自己好有用hehe

去緊茶葉園既途中Ngo發現都幾遠，提議食lunch先

咁岩經過有間餐廳就入去食lu

(呢點同我好似， 唔會突登搵邊度有好野食一定要去果度XD) 

去茶葉園條路好大沙塵。。 條路都有d 難行

終於到左之後我地坐低食下野hea下先

未試過都唔知原來黑糯米同yoghurt係咁夾架！

杯Yoghurt好好味仲只係hkd3!

休息完就緊係開始瘋狂影相啦XD

第一次去咁大既茶葉園， 未有機會去Sri Lanka 黎呢度感受下都好

仲有個心形既位添

之後佢地話去Plum Blossom Garden, 我之前係完全唔知有呢個地方架!
起Doi Che Trai Tim沿住TL104再揸去向西面少少就到,
一黎到呢個位見到一望無際既梨花樹真係壯觀到忍唔住WOW一聲!!!!

即刻衝落去同梨花近距離接觸!

我地D"戰車"!!

佢地問左staff, 再揸入D會有個油菜花田, 真係大到呢!!!

最重要係咩? 冇人呀!!!

可惜相機冇全景MODE, 成個油菜花田有下面呢幅相既5倍闊!

呢度真係靚到影極都仲想影

番到木州市5點幾，諗住去埋Hang Doi (Bat Cave)

不過開始天黑， 都係聽日先再黎過喇~

今晚又係同楊冪一家食飯，今晚佢媽媽都黎埋，

有其母必有其女， 佢媽媽都好靚！

仲不停夾餸比我食， so warm!!

呢晚住起度既客人竟然仲租左架disco 車黎做燈光唱K...

睇得出越南人幾咁中意唱K...

~End of Day9~

尋日已經約好Ngo佢地一齊出發去Dai Yem Waterfall,
入瀑布條路有好多串燒檔！

竹筒飯

好多都係由小妹妹睇檔

黎到瀑布喇~

其實都冇咩特別，唔算好壯觀， 仲幾多人添

好靚呀呢個妹妹！忍唔住要幫襯佢！

一場黎到， 一於坐低食下野~

叫左竹筒飯同串燒share食，

D 竹筒飯(串燒上面果舊..食得太快影唔切原貌..)係冇餡既，但就真係好吸收到竹筒既香氣！

沾上碟上既花生碎/類似椒鹽既野

又幾特別幾好食喎！

之後佢地5個就準備離開木州喇，

而我見時間唔趕， 回程唔行小路應該6個鐘內番到河內

去埋尋日未去既Hang Doi先

其實越南有好多大大小小既岩洞，

呢個比下龍灣既Sung Sot cave 細同冇打燈

雖然冇去到原定既風芽國家公園, 但識到佢地5個越南人, 

仲帶我去一D我唔識去但又好靚既地方, 又食到D咁地道既野食, 

今次木州之行真係無悔呀!

12點幾番homestay執埋行李就開始起行番河內喇~

可惜不幸既事又發生喇.........

唔知係咪因為我歸家心切...keep住開到70km/h一路揸左2個幾鐘..

起Hoa Binh省附近既一條高速公路架車突然"噗"一聲, 之後個碌就唔再轉喇......

點撻都撻唔郁架車...又仲有2個幾鐘先番到河內.....

無計可施之下唯有發揮電波少女既精神搵人求救.....

起時速70KM既高速公路上面SOS左15分鐘左右, 終於有個好心男停低睇下我架車咩事

可惜佢唔識英文...body language左一陣佢竟然問我識唔識日文!!

起呢刻我真係覺得自己識日文好有用!!!

原來佢係起日本讀大學既, 唔怪得之啦!

佢話佢想一路揸電單車一路伸右腳出黎推我架車, 

冇錯, 呢招係我上年起會安架車冇油果陣已經見識過既越南神技,

估唔到原來好多越南人都識!!

推左一陣發覺起高速公路咁樣龜速推車都唔係路,

佢叫我落車企起度等佢5分鐘, 究竟佢想點幫我呢?

5分鐘之後佢竟然可以起果個咁荒蕪既地方班到條好結實又粗既繩番黎!

就係咁佢就用果條繩綁住佢架車同我架車拉住黎行, 快過頭先好多~~

行左2KM 左右竟然又起果個咁荒蕪既地方有間整電單車既舖頭!!

成件事實在太黑仔又太好彩喇.....

同恩人道別之前影番張相留念先~

 起間舖度竟然有個識講普通話既嬸嬸, 原來係之前去過台灣做野既,

話佢今朝9點等架車整好等到而家3點幾....唔係呀化.......

好彩我果架整左1個鐘左右就整好!!

整車整左成2百幾港紙.....但都冇計...

6點幾番到hostel, 即刻拿拿臨去citimart買完手信就去番Mon Hue食dinner lu

第二朝起河內搭巴士去南寧, 成程巴士起又臭又嘈...再加上過關唔知點解係冇隊排, 

成班人係咁逼...真係極之痛苦人都癲....

~End~