Day 8: 猊鼻渓, 平泉中尊寺

Day 8: 25/10(Tues)  猊鼻渓, 平泉中尊寺

今日既行程係尋日先至決定既~呢兩個地方由花卷出發既話其實應該去平泉先會順D,

但因為知道今日下晝陰天+落雨, 所以將中尊寺排起下晝

搭巴士去番花卷站再轉去猊鼻渓站~ 中途原本想將行李放起中轉站一ノ関站, 點知locker full哂..

10:53到猊鼻渓駅，岩岩11點行到去上船點！船費1600yen 來回, 大約個半鐘
好彩原來猊鼻渓登船口可以免費寄行李~ 職員見你有大件行李就會主動同你寄~
雖然紅葉未見頃但天氣一流！

上船位有得買魚餌，D鴨鴨知道會有人喂, 好努力咁係咁游追住我地!
船夫仲話d 魚個名叫"速い"haha

毘沙門天
太遠好難凡丟得中....

去到溪既盡頭可以落船上岸邊行下~

 崖度有個窿，側邊100yen可以拎5粒好似象棋既野，上面寫住你想祈求既野，愛情，福，緣之類，但完全冇人丟得中。。

回程船夫仲有唱歌表演~

 D燒魚既魚就係頭先起溪度既"速い" haha

13:12 搭番去一ノ関~

問案內所姐姐車站邊度有野食....原來得一間cafe...

和牛食上癮之第3餐， 岩手南牛定食

食完lunch 番番去果個locker, 仲係full 哂， 結果隔離案內所個姐姐叫我試下500yen locker 
竟然又塞得入！

14:43 出發去世界遺產平泉!

成個下晝都天陰陰
上山條奪命斜真係要左老娘條命

 金色寺要行到最入先到, 可惜唔比影相,
但真係好西利，可以成個寺都咁金保留到而家。。東南亞果d寺廟話以前有寶石，而家一d都保留唔到

千年古樹年輪知典故

 4點半左右落到山腳過對面搭既士番平泉駅~

臨走起平泉駅見到有好多牛舌手信好想買。。。可惜要雪住。。
最後只係買左牛舌百力滋同牛舌乾。。

番到日光都成9點, 所以我既晚餐就係仙台駅買既牛舌弁当~~正當我問佢有冇得整熱既時候，原來拉一拉個盒條繩就會發熱！勁呀！

 車度仲買左青森蘋果雪糕做甜品~ 好滿足!

搭去日光既JR列車, 一見到即刻諗起"Hong Kong is not....."

今晚終於有番hostel(Nikko Park Lodge)住, 東武日光站對面, 地理位置好方便
但因為我9點先到既關係...reception已經冇staff起度..搞左一大輪先入到屋....

好彩既係今晚間dorm有個好好傾既台妹小菱!
大家都中意一個人周圍去旅行周圍搭訕周圍亂行! 仲要都係下年打算去南美!
話題太多時間太少傾到涼都唔捨得沖!
小菱聽到我話聽朝要搭最早果架巴士竟然話要捨命陪君子XD!
愉快既一晚!

~End of Day8~

>>Day 9: 日光 戦場ガ原, 中禅寺湖, 東照宮<<