MiuMiu遊世界: Day 5 十二湖, 崩山

Day 5: 22/10(Sat) 十二湖, 崩山

一朝早起身當然要試不老不死最出名既可以睇住海岸線露天溫泉!

6am開但我6:10am去到混浴池已經有伯伯s起度, 所以只可以去右邊女性專用溫泉~

不過因為太凍既關係, 連D溫泉水都唔係好熱, 浸一陣就走喇~

早餐係buffet形式~7點去到食堂已經人山人海~搭台坐左起貌似一家人既日本人度~

之後一路食一路同佢地傾計, 原來佢地唔係一家人, 佢地自稱係北海道行山隊haha~~

佢地對呢個由香港一個人黎旅行既人非常好奇~HAHA不斷問問題, 又問我點識搵到呢間溫泉酒店咁叻, 又係咁講自己認識香港既所有事物, 食過杏仁糊呀, 去過維港呀, 去過Macau睇水舞間呀...哈哈好鬼得意~~

唔覺唔覺同佢地傾左個幾鐘都唔捨得走! 不過原來佢地一陣都係去十二湖, 可能會再見呢~~

8:45am 搭第一班去十二湖既巴士~~

行李寄存起十二湖駅巴士站隔離果度(好出名既婆婆), 自己搵位放好再交200yen比婆婆20秒內搞掂上番巴士~ 之後一直搭到去奧十二湖

十二湖係屬於白神山地既一部分, 而白神山地已被歸納為世界遺産之中~

>>十二湖散策地圖<<

襯好天即去最出名既青池先~~行去途中已經好幾個龍友行緊過去, 跟住行實冇死~~

雞頭場之池

行十分鐘左右就到青池喇~~

附近都開始有紅葉~

木上面仲生左好多菇添~~

周圍不斷咁聽到"好像好好吃呀~" "應該有毒吧" " ar~~~Kawai ne~~"....

上完樓梯就到ブナ自然林,

"ブナ"中文係山毛欅樹, 日文漢字又名"橅", 即係我尋日搭果架白神號既名~

因為頭先搭車黎果陣見到湖邊紅葉好靚, 於是又行番去落口之池影相~~

岩岩行到落口之池果陣竟然真係撞番今朝一齊食早餐既北海道行山團HAHA!!真係好有緣!!

朝早太陽射落紅葉上面好靚呀~

11:30am 見時間唔早就開始上崩山喇~(呢個山完全冇遊客行, 點解?一陣就知....)

登山口起青池隔離, 所以又要行番番去

一行到去驚見今朝一齊行果幾個龍友仲起度!! 仲叫埋我一齊影相haha

好, 正式上山!! 開頭果15分鐘輕輕鬆鬆仲以為呢個山咁簡單, 少年你真的太年輕了

起崩山行山絕對比人一種入左深山探險既感覺!! 點解?

1. 首先, 完全0石屎路

2. 山上我只係見過8個日本人

3. 沿途會見到好多自然生態, 除左有好多菇之外, 仲有好似係有毒既野果, 勁大隻既蟻, 成棵生哂青苔既樹訓左起地下之類

4. 樹全部都極之高大, 屬於溫帶森林

5. 條路真係非常"天然", 部分路都真係幾難行, 中途行錯路仲好似去左攀石咁...好彩聽到遠處有人帶住熊鈴行過, 我大叫問我係咪行錯路先走得番出黎....如果唔係唔知攀石攀到幾時...

行到較高位置開始比紅葉包圍喇~~

1:30pm 幾經辛苦終於上到黎展望所, 可以鳥瞰十二湖!! 好壯觀呀!!行得咁辛苦就係為左呢個景!!

(我仲以為有張櫈坐下抖抖, 點知冇之餘企起呢個咁sharp既懸崖邊仲有D畏高腳仔軟.....)

起隔離影相既龍友哥哥見我面色唔多好請我食糖, 好鬼溫馨架姐

落番黎比較輕鬆~1個鐘就番到青池lu~~

起呢個咁肚餓既情況下又想睇多D野, 竟然諗住去refresh村個餐廳食野再去金山之池,結果...
行到去refresh村先發現餐廳冇開(而佢路牌的確寫住會不定休....)
飢寒交逼之下真係行唔到去金山之池喇...咁岩見到有車去緊王池方向,
即刻再SOS搭個順風車! YEAH原來送貨伯伯都係去緊王池果邊既餐廳hea

巴士4點半先到, 食飽再去王池影多陣相先,
(本身諗住行埋去Canyon日本大峽谷睇, 但真係冇電喇....)

之後搭巴士番十二湖駅, 拎番行李果陣見婆婆好似成日冇郁過咁坐起果度位XD

上左白神號4號搭2個鐘又去到下一站 - 秋田!

--------------------------------------------------------------------------------------------------------------------------

秋田住宿篇

話說明明張機票係上年就買左, 行程一早plan好, 溫泉酒店果D又記得一早book好哂,
而秋田呢個地方感覺上附近冇咩景點(唔係第二朝要去寒風山玩paragliding都未必住秋田),
又冇溫泉酒店, 所以就懶懶閒一直都未book秋田既酒店..

點知....................
到出發前一個月上booking.com/agoda果D發現全部酒店都fully booked?!!
秋田又冇airbnb又冇hostel咁我唔通要訓車站?....唯有book左間離秋田幾個站既airbnb...
點知到臨出發前一個星期又cancel左我booking!! 豈有此理!!
絕望之際突然靈機一觸我仲可以搵couchsurfing....一次過send左5個request...
其中一個澳州仔Peter第2日好快就覆左我話ok!! 太好喇!! 唔洗訓街!!

佢係起秋田度做英文助教, 黎左秋田只係3個月, 努力學日文中~~
我同佢有好多共通點~最大既莫過於大家起大學都係讀chem既hahahaha~~
又係中意行山踩單車跳舞~ 同埋board game~~

呢晚7點鐘約左起秋田駅西口等~放完行李起佢屋企就去食飯先~
佢揀左間就起佢屋企樓下既燒肉店~ 好好食不過有d貴~
日本人既oishii有時都不能盡信...個鱈魚子真係重口味到呢....