Uyuni – Atacama 三天團 – Day3

3月3日  Uyuni – Atacama 三天團 – Day3

6點幾起身食早餐~今日有pancake, yoghurt, cereal~

今日天氣非常好, 早知起身睇日出....

前面長方形既就係溫泉喇~~

我地間旅館~

第一站黎到個好多雪山既地方~

之後黎到Laguna Blanco 白湖 (咁都叫一個景點?....)

之後就要換去另一架3個美國人+3個德國人果架車喇~因為我原本架車全部人都係番Uyuni既, 而另一架車既3個美國人都係去Atacama既

同呢3日既團友道別果陣估唔到會咁唔捨得….

呢個司機真係又nice又funny, 呢3日仲成日關心我隻腳有冇事添~

今日黎到第3個國家, 心情好複雜…隻腳又唔知幾時先好番, 電話又未整好….

繞過呢座山後面就係智利喇~~

排隊出境

過左境去到Atacama又撞番之前起鹽旅館識既3個台灣人Room, Stan, 娟, 原來Room同Stan係兩兄弟! 同車仲有一對就黎結婚既日本couple, 起冇電話(後備電話係用Microsim card…用唔到我張車美simcard)既情況之下一於就跟住成班亞州人一齊去搵hostel喇~~ 

有伴一齊旅行既感覺真好!!跟住落車收到既傳單指示去到一間幾遠既hostel, Juriques Hostal,  9000peso/night

Checkin 左之後就一齊去巴士站買巴士飛喇~

台灣人同日本情侶都係搭去Santiago既聽日就有巴士出發, 但原來去Salta既巴士唔係日日有….我要等到後日先有車走……呀….因為Uyuni番耐左仲諗住cut atacama一日行程去Buenos Aires…唯有要cut BA行程喇….

之後行番去鎮中心, 大家岩岩到智利都要攞錢, 試左5部ATM先得一部禁到錢出黎…同埋我地發現通常起智利既藥房入面都會有一部ATM! MUD原來智利D藥貴到要有咁既安排架咩?

起Atacama既藥房終於買到95%純酒精, 已經急不及待想試下整番好部電話!! 另外仲買左玻利維亞朋友Jenni(起Oruro食早餐識既)介紹既Diclofenac消腫gel, 希望快D消腫啦!

之後大家一齊去market食lunch(平D丫嘛)

黎到智利發現呢度有收小費既習慣, 我諗住叫老板娘幫我唱散紙果陣, 老闆見我遞銀紙比佢即刻笑到4萬咁口, 我反應快即刻收番…..

食完飯就一齊去睇下d tour喇, 本身諗住一齊報Astro tour星空團, 點知問第一間就話今晚會落雨唔出團(下?! 天氣好到萬里無雲wor!), 第2間要11pm果團先有位(9:30pm full左), 第3間要1am先有位……..有冇咁誇張…..於是台灣人就放棄左喇…之後我地就行下街~原來room同stan有收集古董毯既喜好, stan既背包有成18條古董毯……………真係O哂咀!!

之後大家番hostel休息, 我就緊係即刻拎個電話出黎整啦!! 將D酒精倒落密實袋, 再將部電話浸落去….浸落去果下真係少D勇氣都唔得….隔離行過既鬼佬見我咁做以為我浸緊水好驚訝XD

點知過左5分鐘就見到部電話自己開機!!死!!唔記得部機仲有幾%電添…比酒精通過通緊電既電話都會整壞部機…部機停左起開機畫面但我又唔關唔到機…好彩Stan即刻幫我search到點樣強制關機…救左我部機一命…之後我都唔敢再浸喇…

晚飯又去番market果邊食, 去左最右手邊果間, 好多狗走過黎楚楚可憐咁既樣黎乞食…坐完起我右邊又坐我左邊…

冇幾耐又有4個亞州人入左黎, 佢地一見到stan都以為佢係日本人!! 佢地係一個台灣男(杰峰), 一個香港女同兩個日本男, haha又係港日台既組合, 兩邊台灣人好自然又傾起上黎~, 原來杰峰已經環遊世界左一年, 而家差唔多係尾聲, 仲話用左智利人價錢買到激平復活島機票, 真係令人羨慕!! 佢地4個係後日先走, 所以我決定聽日跟埋佢地一齊Join Moon Valley同Astro Tour喇~

食完飯番到hostel, 又識多幾個新既亞州朋友, 於是間common room呢晚竟然係比我地十幾個亞州人佔據左, 一路吹水吹到十二點!! 我住左咁多次外國hostel都未見過呢個境況!!